• Timor-Leste no Banku Dezenvolvimentu Aziátiku Asina Akordu Empréstimu millaun $135 no Troka Nota Fundu Doasaun millaun $44, ho Governu Japaun ba Dezenvolvimentu Aeroportu Internasionál Prezidente Nicolau Lobato

Home » Anúnsiu » Komunikadus » Timor-Leste no Banku Dezenvolvimentu Aziátiku Asina Akordu Empréstimu millaun $135 no Troka Nota Fundu Doasaun millaun $44, ho Governu Japaun ba Dezenvolvimentu Aeroportu Internasionál Prezidente Nicolau Lobato Imprime pájina

Timor-Leste no Banku Dezenvolvimentu Aziátiku Asina Akordu Empréstimu millaun $135 no Troka Nota Fundu Doasaun millaun $44, ho Governu Japaun ba Dezenvolvimentu Aeroportu Internasionál Prezidente Nicolau Lobato

Díli, 1 outubru 2021 – Ministru Finansas, Rui Augusto Gomes, reprezenta Governu Timor-Leste no reprezentante Banku Dezenvolvimentu Aziátiku (BDA), Sunil Mitra – ohin, asina ona Akordu Empréstimu ho montante millaun $135 ne’ebé sei uza hodi finansia projetu estensaun pista atterajen, konstrusaun torre-kontrole tráfiku aéreu no reabilitasaun fasilidade sira seluk iha Aeroportu Internasionál Prezidente Nicolau Lobato (AIPNL). Iha sorin seluk, Governu Timor-Leste aloka totál millaun $30 hodi finansia obra konstrusaun sivíl, akizasaun rai, kompensasaun ai-horis no kustu sira seluk relasiona ho reasentamentu família sira ne’ebé mak hela besik iha Aeroportu.

Nafatin iha ámbitu projetu espansaun no melloramentu AIPNL, Vise-Ministru Negósius Estranjeirus no Kooperasaun, Julião da Silva no Embaixadór Japaun iha Timor-Leste, Masami Kinefuchi, asina ona Troka Nota Fundu Doasaun kuaze millaun $44. Fundu doasaun ne’e sei uza ba konstrusaun terminál pasajeirus foun no estasaun fornesimentu enerjia dedikadu ba Aeroportu.

Ho projetu ne’e, Timor-Leste sei bele kumpri padraun seguransa, garantia transportasaun aéreu ida ne’ebé seguru no efisiente, mellora konektividade aéreu ho país viziñu iha Ázia no Pasífiku, promove Turizmu no setór ekonómiku sira seluk hodi ajuda Timor-Leste diversifika ninia ekonomia no ikus liu, kontribui ba país nia adesaun ba ASEAN.

Ministru Finansas, Rui Augusto Gomes hateten,“Melloramentu konektividade aéreu nesesáriu tebes ba dezenvolvimentu turizmu ne’ebé hanesan motór importante ida ba kresimentu ekonómiku. Fasilidade no seguransa Aeroportu ne’ebé di’ak sei fasilita troka sasán, servisus, koñesimentu no ideas liuhusi ligasaun ho sidade boot sira iha aziátiku. Timor-Leste presiza asesu ne’ebé di’ak ba kapitál internasionál, rekursu humanu no investimentu, no mellora konektividade aéreu potensialmente sei fó efeitu transformativu ba iha ekonomia”.

 Reprezentante sira husi Estadu Timor-Leste ne’ebé hola parte iha Komisaun Inter-Ministeriál ne’ebé lidera husi Vise-Primeiru-Ministru no Ministru Planu no Ordenamentu, inklui Ministrus Transporte no Komunikasaun, Obras Públikas, Negósius Estranjeirus no Kooperasaun no Finansas. Ministériu hirak ne’e hetan apoiu tékniku husi BDA, Governu Japaun, Austrália no Korporasaun Finanseira Internasionál (IFC, sigla Inglés).

 

 

Ramesh Subramaniam, Diretór Jerál Departamentu Rejionál Sudeste Aziátiku, BDA hateten “Projetu ida-ne’e akontese iha tempu ne’ebé propriu. Pandemia Covid-19 perturba ona konektividade aéreu. Timor-Leste no mundu esperiénsia ona impaktu ekonómiku. Ida-ne’e hatudu importansia atu mellora konektividade aéreu ba rekuperasaun ekonómiku, liuliu iha rejiaun no país sira hanesan Timor-Leste, ne’ebé hetan kresimentu ekonómiku ki’ik tebes iha tinan kotuk no hatudu deklina 90% iha ninia konektivade aéreu”.

“Loron ohin nu’udar loron ne’ebé mak Ita hothotu hein; loron asinatura akordu internasionál ba projetu Aeroportu Internasionál Prezidente Nicolau Lobato”. Embaixadór Japaun ba Timor-Leste, Sr. Masami Kinefuchi hateten “Tinan ruanulu ikus hanesan períodu rekonstrusaun hafoin Timor-Leste restaura nia Independénsia no fiar katak Timor-Leste sei transforma tinan ruanulu oin mai sai nu’udar faze foun ida ba kresimentu ekonómiku no dezenvolvimentu sosiál, ne’ebé impulsiona husi Projetu Aeroportu ne’e”.

Iha nia diskursu enseramentu, Primeiru-Ministru, Jenerál Taur Matan Ruak hateten, “Asinatura konjunta tuir empréstimu no Nota ba Fundu Doasaun nian nu’udár marku boot ida iha dezenvolvimentu transporte sira, ba navegasaun no aviasaun aérea no integrasaun Timor-Leste iha nivel internasionál, ne’ebé sei fó benefísiu ba ita-nia prosesu adezaun ba Asosiasaun País Sudeste Aziátiku, ba Organizasaun Mundiál Komérsiu no ba organizasaun internasionál sira seluk. Lori Governu no Povu Timor-Leste nia naran, liuliu ba viajante, emprezáriu, sidadaun no utente sira, ha’u hakarak tebes hato’o ba sira hotu ne’ebé envolve ona iha parte negosiasaun ida-ne’e, ne’ebé agora hala’o hela, ha’u-nia sinseru agradesimentu, hahii ba Ita-Boot sira-nia servisu, esforsu no dedikasaun individuál no koletiva. Ho ida-ne’e no obra boot sira seluk, ita sei promove ba hadi’a filafali ekonomia ne’ebé ezije husi sidadaun sira no sei prepara nasaun ba oportunidade rekuperasaun ekonómika no sosiál, iha kontestu pós- COVID-19 ne’ebé maka hakat lais tebetebes mai daudaun”.

Projetu espansaun AIPNL aliña ho Planu Estratéjiku Dezenvolvimentu Nasionál 2011-2030 ne’ebé nia prioridade boot ida mak dezenvolvimentu infraestrutura ho obetivu atu konsolida kresimentu ekonómiku no redús desigualidade. Tuir planu, projetu ne’e sei ramata iha tinan 2025 nia rohan.

Aleinde projetu ida-ne’e, konstrusaun Portu Baía Tibar mós la’o hela no sei ramata iha fulan-maiu 2022. Mega projetu rua ne’e sei fasilita Timor-Leste nia konektividade internasionál no integrasaun ba rejionál no globál.

Inisiativa seluk ne’ebé daudaun ne’e iha hela faze prelimináriu mak Projetu Re-Dezenvolvimentu no Komersializasaun Portu Díli ne’ebé iha futuru sei uza ba portu pasajeiru, karga doméstika, atividade sira liga ho turizmu mariña hanesan kurrida internasionál ró-iate, haree/observa baleia no golfiñu. Projetu ne’e ho modalidade Parseria Públiku-Privada ho kustu estimativu millaun $50 resin. Projetu ne’e administra husi Autoridade Portuária Timor-Leste (APORTIL, sigla Portugés), ajénsia autónomu ida ne’ebé tutela iha Ministériu Transporte no Komunikasaun ho asisténsia tékniku husi USAID’s Tourism For All Project.

Instalasaun kabu submariñu fibra ótiku ne’ebé liga mai Díli husi Darwin nia dezeñu enjeñaria iha ona faze finál no Komisaun Nasionál Aprovizionamentu inísia ona konkursu no hahú simu submisaun proposta tékniku no finanseiru to’o iha 11 outubru 2021. Finansiamentu ba projetu ne’e mai husi Fundu Infraestrutura ho kustu estimativu millaun $42. Projetu ne’e sei permite servisus interligasaun rede telefone no internet ne’ebé lailais liu, baratu liu no seguru liu.

Partisipa iha serimónia asinatura Akordu Empréstimu no Troka Nota ne’e, Primeiru-Ministru, Jenerál Taur Matan Ruak, Vise-Primeira-Ministra, Armanda Berta dos Santos no Membrus Oitavu Governu Konstitusionál. Reprezentante husi BDA, Sunil Mitra, Diretór Misaun BDA iha Timor-Leste, Ramesh Subramaniam, Diretór Jerál Departamentu Rejionál Sudeste Aziátiku, Paul Dominguez, Diretór Konsellu Diretivu no Chaorim Shim, Xefe Ekipa Negosiadór.

Iha Sorumutuk loron 15 fulan-setembru tinan 2021, Konsellu Ministrus atribui podér tomak ba Ministru Rui Augusto Gomes hodi reprezenta Governu Timor-Leste asina Akordu Empréstimu ho BDA. Ba faze dahuluk dezenvolvimentu AIPNL, Konsellu Ministrus mós autoriza loke prosedimentu aprovizionamentu tolu ho tipu konkursu públiku internasionál, ba ajudikasaun kontratu públiku ba kontratasaun empreza sira ba konsesaun no konstrusaun, ba fornesimentu servisu supervizaun no jestaun projetu nian. ***