• Timor-Leste no Banku Dezenvolvimentu Aziátiku Asina Akordu millaun $50 – Konstrui Infraestrutura Bee no Saneamentu iha sidade Lospalos, Same no Vikeke

Home » Anúnsiu » Notisiáriu » Timor-Leste no Banku Dezenvolvimentu Aziátiku Asina Akordu millaun $50 – Konstrui Infraestrutura Bee no Saneamentu iha sidade Lospalos, Same no Vikeke Imprime pájina

Timor-Leste no Banku Dezenvolvimentu Aziátiku Asina Akordu millaun $50 – Konstrui Infraestrutura Bee no Saneamentu iha sidade Lospalos, Same no Vikeke

Díli, 6 Agostu 2021 – Ministru Finansas, Rui Augusto Gomes, reprezenta Estadu Timor-Leste no Diretór Misaun Sunil Mitra reprezenta Banku Dezenvolvimentu Aziátiku (ADB, sigla Inglés) iha Timor-Leste, ohin, asina ona Akordu Kontribuisaun Finanseira ba Dahuluk iha área Bee no Saneamentu ho montante millaun $50.

Akordu kontribuisaun finanseira ne’e sei uza hodi konstrui infraestrutura Bee no Saneamentu iha sidade Lospalos, Same no Vikeke hodi fornese asesu ba servisu abastesimentu Bee no Saneamentu ida ne’ebé sustentável no inkluzivu. Kompozisaun finanseira ne’e rasik kompostu husi Empréstimu ho montante millaun $47 no Grant millaun $3. Aleinde ne’e, Estadu Timor-Leste mós sei kontribui ho montante millaun $12,5.

Kontribuisaun finanseira ho montante totál millaun $62,5 (inklui kontribuisaun Governu millaun $12,5), sei aloka ba Projetu Fornesimentu Bee no Saneamentu iha sidade Lospalos, Same no Vikeke ne’ebé sei benefisia populasaun hamutuk 62.000. Aleinde ne’e, sei fó mós treinamentu kona-ba Planeamentu, Jestaun Projetu, Jestaun Patrimóniu, Operasaun no Manutensaun Bee, Jestaun Finansas no Koleksaun Tarifa ba funsionáriu lima-nulu (feto 8%) iha Servisu Munisípiu Agua, Saneamentu no Ambiente (SMASA). Projetu ne’e rasik ho durasaun tinan ualu (8) no sei kompleta iha fulan-setembru, tinan 2028.

Ministru Rui Gomes hateten “Kuaze besik porsentu neen-nulu (60%) husi totál empréstimu Timor-Leste mai husi Banku Dezenvolvimentu Aziátiku. Ida-ne’e hatudu Banku ninia konfiansa mai Governu Timor-Leste. Liuhusi Empréstimu, Asisténsia Tékniku no Grants, Timor-Leste bele dezenvolve ninia konektividade, investe iha kapitál umanu hodi hadi’ak produtividade traballadór sira, ne’ebé importante tebes ba kresimentu empregu no investimentu setór privadu.”

Reprezentante Estadu ne’e mós bolu atensaun ba liña ministériu relevante, ajénsia implementador no autoridade lokál sira atu mellora sira nia prestasaun servisu iha nível baze atu garantia katak asisténsia no investimentu ida-ne’e ezekuta tuir tempu bazeia ba termus referensia ne’ebe prevê ona iha akordu, hodi ikus mai bele lori impaktu signifikativu no mudansa pozitivu ba iha Timoroan sira nia moris.

Iha eventu Asinatura Akordu ne’e, Ministru Rui Gomes akompaña husi Ministra Negósius Estranjeirus no Kooperasaun, Adaljiza Magno, Ministru Obras Públikas, Salvador Soares dos Reis Pires no Vise-Ministru Estatál, Lino de Jesus Torrezão.

Iha Sorumutuk loron 28 fulan-jullu tinan 2021, Konsellu Ministrus atribui podér tomak ba Ministru Finansas, Rui Augusto Gomes atu reprezenta Estadu Timor-Leste hodi Asina Akordu Kontribuisaun Finanseira ho Banku Dezenvolvimentu Aziátiku. ***