• Timor-Leste sei sai Uma-na’in ba Vizita Grupu Konsellu Diretoria ADB iha fulan-Agostu 2021

Home » Announcements » Timor-Leste sei sai Uma-na’in ba Vizita Grupu Konsellu Diretoria ADB iha fulan-Agostu 2021 Print Page

Timor-Leste sei sai Uma-na’in ba Vizita Grupu Konsellu Diretoria ADB iha fulan-Agostu 2021

Díli, 15 fulan-Juñu 2021 – Governu Timor-Leste ho apoiu husi Misaun Rezidente Banku Dezenvolvimentu Aziátiku (ADB, sigla Inglés) iha Timor-Leste, liuhusi plataforma virtuál, sei realiza Vizita Grupu Konsellu Diretoria ADB mai Timor-Leste iha fulan-Agostu 2021 – desizaun ne’e konfirma iha reuniaun ida ne’ebé hala’o ohin loron entre Ministru Finansas, Rui Augusto Gomes no Diretór Misaun ADB iha Timor-Leste, Sunil Mitra.

Reuniaun Altu-Nivel ne’e sei serve hanesan oportunidade ida ba Diretór Ezekutivu no Diretór Ezekutivu Suplente sira husi Konsellu Diretoria: (i) atu hatene di’ak liután kona-ba esperiénsia dezenvolvimentu no nesesidade sira husi membrus país sei dezenvolve hela ne’ebé mak sira vizita ba, no iha rejiaun; (ii) atu hatene di’ak liután kona-ba ADB ninia atividades iha nia membrus país; no (iii) atu apresia oportunidade no limitasaun sira ba koordenasaun doadór.

Vizita Altu-Nivel ne’e sei fasilita ofisiál sira husi ADB nia membrus país atu fó komentáriu kona-ba aspeitu dezenvolvimentu ne’ebé mak tama iha ADB nia área ba país uma-na’in. Importante liután, vizita ne’e sei sai hanesan momentu ida ne’ebé úniku ba membrus Governu relevante atu hametin liután sira-nia relasaun ho ADB atu apoiu Timor-Leste alkanse ninia Objetivus Dezenvolvimentu.

Vizita ida-ne’e mak hanesan vizita ba dahuluk iha istória Timor-Leste. Onra ida ba Timor-Leste bainhira Grupu Konsellu Diretoria hili atu sai uma-na’in ba forum altu-nivel ne’e. Desizaun ADB bazeia ba faktu katak ADB ninia operasaun iha Timor-Leste transfere ona husi Departamentu Rejionál Pasífiku ba iha ninia Departamentu Rejionál Sudeste Aziátiku. Mudansa ida-ne’e hasa’e liután Timor-Leste ninia vizibilidade iha rejiaun ne’e no reafirma liután Timor-Leste ninia aspirasaun atu adere ba ASEAN.

Vizita ba dahuluk ne’ebé Timor-Leste mak sai uma-na’in, sei envolve diskusaun polítika no tékniku balun, entre diskusaun hirak ne’e, iha aprezentasaun husi Misaun Rezidente ADB iha Timor-Leste kona-ba kontextu istóriku no ekonómiku país Timor-Leste no mós ADB ninia projetu pasadu, prezente no futuru. Grupu Konsellu Diretoria ADB, liuhusi plataforma virtuál, sei vizita no rona aprezentasaun husi Instituisaun Estadu relevante, ne’ebé nia informasaun detalla sei konfirma iha tempu tuir-mai. Enkuantu iha nivel Ezekutivu, Grupu Konsellu Diretoria sei hasoru malu ho Ministru Finansas, Rui Augusto Gomes ne’ebé mós hanesan Governadór reprezenta Timor-Leste iha ADB, no liña ministériu relevante sira seluk, ajénsia autonómu, Parseirus Dezenvolvimentu no mós setór privadu. ***