• TL no PDs koalia hamutuk progresu, dezafiu no prioridade iha “ TLDPM 2015”

Home » Anúnsiu » TL no PDs koalia hamutuk progresu, dezafiu no prioridade iha “ TLDPM 2015” Imprime pájina

TL no PDs koalia hamutuk progresu, dezafiu no prioridade iha “ TLDPM 2015”

Governu Timor-Leste halao sorumutu anuál loron tomak ida ho Parseiru Dezenvolvimentu sira iha loron Sábadu, 6 Juniu 2015, iha Sentru Konvensaun Dili. Sorumutu ida ne’e mai ho tema jerál – Konsolida Instituisaun Hodi Halo Tranzisaun ba Reziliensia. Sorumutu ida, hahú ho Enkontru Bilateral iha loron 4 Juniu 2015, organiza husi Ministériu Finansas no atende husi membru sira Parseiru Dezenvolvimentu no nasaun g7+. Primeiru Ministru, Dr. Rui Maria de Araújo hateten, sorumutu ida ne’e hanesan “tradisaun diak ida ne’ebé halibur” parte hotu-hotu hodi aktualiza progresu, identifika dezafiu no estabelese prioridade.

Primeiru Ministru iha ninia lian-makloke, temin sai progresu sira ne’ebé atinji tiha iha seitór siguransa, sosial, ekonómiku no infraestrutura. Maske nune’e, Primeiru Ministru mo’os fo hanoin katak dezafiu barak maka sei iha hanesan limitasaun asesu ba servisu saúde, edukasaun, beé mo’os, infraestrutura bázika no servisu governu nian sira seluk.

Atu hatán ba dezafiu sira ne’e, Primeiru Ministru hateten Governu tau iha ninia prioridade sira hodi hadiak fornesimentu servisu no kualidade obras públikas. Nia akresenta tan katak Governu iha komitimentu hodi hametin liu tan governasaun diak inklui transparénsia, lideransa étika, akuntabilidade ba dezenpeñu, empregu bazeia ba méritu no polítika bazeia ba evidensia. Primeiru Ministru mo’os fo énfaze maka’as ba importánsia husi diversifikasaun ekonómika hodi asegura future ida sustentável no kriasaun servisu. Atu atinji buat hirak ne’e, Governu sei tau atensaun ba dezenvolvimentu seitor turizmu, agríkola no petrolífera.

Vice Ministru, Sr. Helder Lopes, iha ninia aprezentasaun temin “dezenvolvientu ne’ebé a’as, inkluzivu no sustentável” maka sai hanesan dezafiu ekonómiku ne’ebé nasaun ida ne’e hasoru. Tan ne’e, VM propoin atu Timor-Leste diversifika ninia ekonomia, hadiak ninia produtividade, kria servisu, dezenvolve seitor privadu no asegura sustentabilidade fiskal. Atu atinji ida ne’e, nia hatutan, Governu sei halo reforma iha área reseitas, despezas no ekonómikas. Tuir nia, reforma fiskal mai ho objetivu ida atu hasa’e reseita husi taxa, kria espasu fiskal, halao despeza ida efetivu no efesiente, hasa’e kresimentu ekonómiku, investimentu doméstiku no investimentu estranjeiru. Ho liafuan badak, reforma fiskal atu hasa’e rasio entre taxa no GDP sa’e ba 15% iha tinan lima (5) nia laran.

Iha sorumutu ida ne’e nia rohan, Primeiru Ministru dala ida tan temin ninia importansia Enkontru ida ne’e. Nia remata hodi dehan “hamutuk ita bele harii ita nia nasaun no hadiak ita nia povu nia moris”.