• Vice Ministru Finánsa atende Diálogu Nivel-Altu Hamentin Reziliénsia Makro-Ekonómika Hasoru Desastre Natural iha Fiji

Home » Anúnsiu » Vice Ministru Finánsa atende Diálogu Nivel-Altu Hamentin Reziliénsia Makro-Ekonómika Hasoru Desastre Natural iha Fiji Imprime pájina

Vice Ministru Finánsa atende Diálogu Nivel-Altu Hamentin Reziliénsia Makro-Ekonómika Hasoru Desastre Natural iha Fiji

S.E. Sr. Helder Lopes, Vice Ministru Finánsa, atende Diálogu Nivel-Altu konaba Hametin Reziliénsia Makro-Ekonómika hasoru Desastre Natural. Diálogu ne’ebé halao iha loron 25 Juniu 2015, iha Nadi, Fiji ne’e, organiza husi Fundu Monetáriu International (FMI) ba Rejiaun Ázia Pasífiku no atende husi Ministru, Governadór no ofisial nivel-altu funsiunalismu públiku sira husi Nasaun sira Ilha Pasífiku, inkluindu Timor-Leste no Seychelles.

Iha Diálogu ida ne’e partisipante sira fahe sira ninia esperiénsia no diskute polítika sira oinsá hametin reziliénsia makro-ekonómika hasoru desastre natural, aliña polítika monetária hodi hametin resiliénsia ba xoke, suporta kresimentu ekonómiku no minimiza risku husi tusan ne’ebé mosu tamba desastre natural.

S.E. Vice Ministru koalia espesifikamente konaba polítika sira hodi hamentin resiliénsia ex-ante no ex-post ba desatre natural no oinsá uza suporta Parseiru Dezenvolvimentu sira nian.

S.E. Sr. Helder Lopes, iha ninia aprezentasaun, hateten katak bai-loron naruk no inundasaun maka sai hanesan disaster natural rua bo’ot ne’ebé afeta tebes-tebes Timor-Leste. Nia elobora liu tan katak polítika sira ne’ebé Governu implementa hodi rezolve problema bo’ot rua ne’e maka “tau osan balun iha fundu kontijénsia, liu husi prosesu orsamental, ne’ebé kompostu husi 5% husi total orsamentu anuál hodi responde ba rekuperasaun disastre”. S.E Vice Ministru moos aumenta tan katak “Governu hahú ona dezeña no implementa infraestrutura resiliente ba mudansa klimátika” hanesan meius ba mitigasaun no prevensaun ba risku desastre natural.

Hatán ba pergunta konaba efetividade husi koordenasaun tulun husi Doadór sira iha jestaun disastre natural, S.E Vice Ministru fo énfaze liu ba iha aprosimasaun “country owned, country led” tuir prinsípiu Akordu Foun. Ho ida ne’e, S.E. Vice Ministru husu atu ba oin Doador sira haré liu ba iha “dezenvolvimentu kapasidade téknika funsiunáriu sira nian” no liu-liu “dezeña no implementa infraestrutura resiliente ba mudansa klimátika”.