• Vice-Ministra Planu no Finansas Kongratula Servisu Tinan 2017

Home » Announcements » Vice-Ministra Planu no Finansas Kongratula Servisu Tinan 2017 Print Page

Vice-Ministra Planu no Finansas Kongratula Servisu Tinan 2017

Vice-Ministra Planu no Finansas Kongratula Servisu Tinan 2017

Vice-Ministra Planu no Finansas, Sara Lobo Brites, lori mos Ministru Planu no Finansas, Rui. A Gomes nia naran, kongratula ba susesu servisu ne’ebé Ministériu Planu no Finansas alkansa iha tinan 2017 hosi área hotu-hotu, embora ho difikuldade no dezafiu oin-oin durante tinan 2017.

Lia hirak ne’e hato’o iha seremonia Isar Bandeira ne’ebé hala’o iha edifísiu Ministériu Planu no Finansas, Aitarak Laran, 8 de-Janeiru 2018.

Vice-Ministra hatutan tan katak, rezultado diak ne’ebé MPF alkansa tiha-ona, kontribui hosi komponente tomak Ministériu Planu no Finansas nian, tantu hosi Diresaun Jeral sira ho ekipa tomak, Unidade sira ekiparadu hanesan Diresaun Jeral, Auditoria Interna inklui Unidade servisu sira iha munisípiu, Fronteiras nomós kolaboradores hotu-hotu nia dezempeñu no servisu nudar profesioanal.

Vice-Ministra mós fó parabens partikularmente ba Diresoens sira ne’ebé involvidu iha fim-do ano, iha ámbitu servisu orsamentasaun, ezekusaun, monotorizasaun, asistensia ba sistema GRP (Goverment Resource Planning) nomos hosi parte legal ne’ebé maske iha loron bo’ot ema barak partilha sira nia tempu ho ida-dak nia família hodi festeja Natal no Ano Novo maibé ekipa sira ne’e mantein iha ida-idak nia eskritoriu hodi assegura servisu ho pasiensia no dedikasaun tomak. Rezultadu hosi esforsu sira ne’e hotu lori MPF taka tinan ho Ezekusaun Orsamentu agregadu no ezekusaun MPF nian atinji 88% ba tinan finanseiru 2017,” haklaken Vice-Ministra.

Iha biban ne’e Vice-Ministra mós fó konselhus, atu ida-idak halo reflesaun oituan ba tinan 2017 liú ba, atu hosik tiha nia hahalok sira ne’ebé ladiak no la-fó benefísiu ba institusaun, husu atu tinan 2018, ida-idak buka mantein hahalok diak sira, ho hanoin foun, atitude no mentalidade foun no buka hakru’uk no banati tuir “Dever” funsionariu públiku ne’ebé kada fulan halo leitura iha seremonia isar bandeira. Ho nune’e iha tinan 2018 ita hotu servisu ho unidade, ida-idak hala’o ninia servisu ho profesional hodi bele hadia diak liu tan Ministériu Planu no Finansas ninia prestasaun servisu ba Estadu no Povo.

Seremonia isar bandeira ne’e nu’udar seremonia dahuluk iha ano finanseiru 2018 ne’ebé hetan partispasaun husi diresoens hotu husi Ministériu Planu no Finansas.