• Vice Ministru Finansas halo abertura ba Ceremonia loke rekerimentu leilaun ba konkursu públiku no interna ba beins moveis estadu

Home » Announcements » Vice Ministru Finansas halo abertura ba Ceremonia loke rekerimentu leilaun ba konkursu públiku no interna ba beins moveis estadu Print Page

Vice Ministru Finansas halo abertura ba Ceremonia loke rekerimentu leilaun ba konkursu públiku no interna ba beins moveis estadu

Kuarta-Feira, 18 Janeiru 2017, Ministériu Finansas liu husi Diresaun Jeral Finansas Estadu (DGFE) – Diresaun Nasional Monitorizasaun Jestaun Patrimoniu Estadu (DNMGPE) hala’o programa ceremonia loke rekerimentu leilaun ho objetivu atu halo validasaun ba proposta ne’ebe rekerente sira submete ona mai DNMGPE .
Januario da Gama, Diretur Jeral Finansas Estadu no Presidente Komisaun Leilaun iha nia observasaun hatete katak, “implementasaun leilaun ne’e ho baze ba desizaun komisaun leilaun ninian no komisaun leilaun estabelese haktuir dekreitu lei 32/ 2011 ne’ebe iha kompetensia para atu bele defende interese estadu nian iha pratika implementasaun servisu alienasaun ”.
Nia mos hatutan, “wanhira Komisaun Leilaun hola desizaun ba kualker modalidade leilaun nian, iha prinsipiu hat mak komisaun leilaun banati tuir mak hanesan; 1) sempre tau as interese estadu nian ba iha kualker desizaun ne’ebe komisaun leilaun foti, 2) bele hatudu prosesu ne’ebe transparensia no iha kredibilidade hodi hetan fiar husi publiku, 3) atu halo salva guarda kondisoens bens moves estadu no ao mesmu tempu bele hetan rendimentu diak ba estadu no 4) prinsipiu ikus liu mak asegura partisipasaun masimu husi públiku/ komunidade hodi evita monoplizasaun husi kompania ka individu ruma iha prosesu alienasaun”.
Iha fatin hanesan Vice Ministru, Helder Lopes esplika katak “iha objetivu fundamentais rua tamba sa ita halo leilaun ne’e mak hanesan atu asegura katak iha efisiensia no efikasia iha despeza públika katak kareta ka motor sira ne’ebe nia kustu manutensaun no operasaun ne’e boot liu ona e prenche ona rekezitus para halo leilaun diak liu halo leilaun duke ita kontinua uza no gasta osan ne’ebe bo’ot ba nia manutensaun no operasaun no tuir mak atu kolekta reseitas ba ita nia estadu husi prosesu leilaun ne’ebe ke iha”.
”Ba instutuisaun estadu tomak ne’ebe ke posivel atu hatama reseitas ba ita nia estadu, husu atu halo esforsu másimu tamba sustentabilidade fiskal ba ita nia estadu ne’e importante teb-tebes hodi nune’e wainhira ita iha reseitas doméstika ne’ebe sufisiente ne’e gradualmente bele hakore ita nia an husi ita depedensia ba reseitas fundu mina rai nian, Helder Lopes haktuir.
Alem de ne’e, governante ne’e subliña liu tan katak “despezas públiku ne’ebe mak iha efisiensia no efikasia ne’e importante tebes tamba bainhira iha despezas ne’ebe efisien no efikas ita sei asegura katak despezas pùbliku ne’ebe ita halo ne’e sei fo benefisiu ne’ebe másimu ba povu husi despezas ne’e be estadu halo tinan-tinan ”.
Antes too ba iha etapa loke rekerimentu leilaun , komisaun leilaun realiza ona reuniaun hola desizaun iha loron 14 Novembru 2016 hodi aplika modalidade leilaun hasta públiku, konkursu públiku ba viaturas no konkursu interna. Diresaun tekniku DNMGPE mos halo ona publikasaun informasaun ba públiku hahu husi loron 12 Dezembru 2016 – 13 Janeiru 2017 no husi periodu refere rekerentes barak mak submete ona proposta mai DNMGPE. Ohin hanesan loron atu bele halo validasaun ba proposta husi rekerente sira tuir modalidade idak-idak nian.
Husi konkursu ne’ebe mak halo, iha instituisaun 7 hanesan GPR , MPCM, MAP, MTAC, IADE, IGE no HNGV ne’ebe mak partisipa iha prosesu leilaun ho modalidade konkursu interna no iha mos konkursu publiku ne’ebe loke oportunidade ba sidadaun hotu-hotu atu bele compete.
Sorumutu ne’ebe realiza iha Sala Cobe House DNMGPE, Balide Rai hun ne’e loke husi Vice Ministru Finansas, Helder Lopes, akompanha husi Januario da Gama nudar Diretor Jeral Finansas Estadu no Presidente Komisaun Leilaun, , Diretor Nasional DNMGPE Sr. Martinho Lopes, Membru Komisaun Leilaun, Observadores husi PDHJ, IGE no Gabinete Inspesaun Interna Ministeriu Finansas nian. Alende nee, hetan mos partisipasaun masimu husi rekerentes sira.