• Vise-Ministra MF Hala’o Enkontru ho Ekipa Tékniku Postu Integradu Salele

Home » Anúnsiu » Vise-Ministra MF Hala’o Enkontru ho Ekipa Tékniku Postu Integradu Salele Imprime pájina

Vise-Ministra MF Hala’o Enkontru ho Ekipa Tékniku Postu Integradu Salele

Vise-Ministra Finansas, Sara Lobo Brites hala’o enkontru ho ekipa tékniku Alfándega Postu Integradu Salele ho objetivu atu bele rona direta preokupasaun ne’ebé ekipa tékniku hasoru iha sira nia servisu fatin, enkontru refere realiza iha salaun Postu Integradu Salele loron 27 Setembru 2018.

Tuir Vise-Ministra Finansas Sara Lobo Brites hateten, Alfándega hanesan papel ida importante liu, dalaruma iha imi nia servisu loro-loron hasoru difikuldade oi-oin, maibé ita tenki hanoin ekipa ida iha Ministériu Finansas. Temporariamente hanesan Ministra nomós hanesan Vise-Ministra Finansas embora hau mesak lakohi husik hela problema sira ne’e monu le’et laiha medidas ruma. Liuhosi enkontu ida ohin espera nafatin iha nia kontinuasaun, atu nune’e ita bele hasoru malu bei-beik fulan rua ka tolu bazeia ba orariu hodi bele diskuti kona-ba problema sira ne’ebé ita bo’ot sira hasoru iha fronteira.

“Alfándega iha fronteira ida ne’e la’os servisu mesak maibé ho komunidade nomós instituisaun sira seluk ne’ebé halo mós sira nia kna’ar iha fronteira no sira mós simu orden hosi sira nia superior. Ida ne’e difikuldade teb-tebes alende hasoru problema internal nomós external”, tenik Vise-Ministra Finansas Sara Lobo Brites.

Ho oportunidade ida ne’e, agradese tebes ba servisu Alfándega Salele nian ne’ebé diak teb-tebes. Ita hotu hatene katak aban-bainrua Aeropotu Suai nia utilizasaun sei másimu liu no Ministériu Finansas liuhosi Alfándega tenki prepara duni atu bele atende situasaun sira aban-bairua nian. Ho ekipa tékniku Alfándega nia operasaun servisu ida agora sei natón no ita mós tenki fo atensaun hela ho dezenvolvimentu sira to tempu ita tenki preparadu.