• Dirasaun Jerál Estatístika (DJE) Simu Smartphone 38 husi Programa Alimentár Mundiál

Home » Anúnsiu » Dirasaun Jerál Estatístika (DJE) Simu Smartphone 38 husi Programa Alimentár Mundiál Imprime pájina

Dirasaun Jerál Estatístika (DJE) Simu Smartphone 38 husi Programa Alimentár Mundiál

Kuarta-feira, 24 fevereiru 2021

Dili, Timor-Leste – Ministériu Finansas (MF) liuhusi Diresaun Jerál Estatísitka (DJE) hetan apoiu smartphone hamutuk tolu-nolu-resin-ualu (38) husi Programa Alimentár Mundiál (WFP, sigla Inglés) atu fasilita koleksaun dadus Índise Presu Konsumedóres (IPK) iha Munisípiu 12 inklui Rejiaun Administrativa Espesiál Oe-Cusse Ambeno (RAEOA).

Diretór Jerál Estatístika, Elias dos Santos Ferreira hateten, durante ne’e Diresaun Jerál Estatístika ami kolekta dadus uza suratahan hanesan entrevista iha merkadu no mós loja sira ne’ebé mak kona sampel. Maibé, ba oin ami sei halo treinamentu ba ami-nia ekipa sira iha Munisípiu 12 inklui RAEOA atu nune’e sira bele uza dijitalizasaun smartphone ne’e hodi halo entrevista.

Smartphone hirak ne’e sei fasilita ekipa kolekta dadus IPK semanál no mensál atu hasa’e kualidade dadus IPK,” informa Diretór Jerál Estatístika, Elias dos Santos Ferreira. “Ida-ne’e hanesan pasu foun ida hodi kolekta dadus ho meius eletróniku, hafasil liután prosesu análiza dadus no hamenus erru.”

Ba oin, DJE sei konvida staff husi Munisípiu 12 inklui RAEOA atu mai iha nasionál hodi hahú halo treinamentu. Planu ida-ne’e sei realiza iha fulan hirak tuir-mai tanbá daudaun ne’e Munisípiu 3 iha hela Serka Sanitária.

Tuir planu, smartphone hirak ne’e sei fahe ba Munisípiu sira. Kada Munisípiu sei hetan smartphone rua no restu sei entrega ba ekipa IPK nasionál.

Reprezentante husi WFP Dageng Liu hateten, “WFP kontenti tebes bele suporta DJE iha parte koleksaun dadus IPK, husi uza surat-tahan ba dijitalizasun uza smarthphone. Ami espera smartphone ne’e bele uza ba iha Munisípiu sira atu fasilita koleksaun dadus ba Índise Presu Konsumedóres.”

“Ha’u hanoin ida ne’e hanesan faze inisiu husi kolaborasaun entre Diresaun Jerál Estatístika ho WFP. Ami sei kontinua fó treinamentu ba staff DJE atu kolekta dadus ho exatu atu informa pessoál foti desizaun sira foti desisaun bazeia ba dadus estatístika ne’ebé iha,” Country Director WFP konklui.