• Workshop Konaba Desentralizasaun Planeamentu no Orsamentu ERMERA, 20-21 DE JULHU 2016

Home » Announcements » Workshop Konaba Desentralizasaun Planeamentu no Orsamentu ERMERA, 20-21 DE JULHU 2016 Print Page

Workshop Konaba Desentralizasaun Planeamentu no Orsamentu ERMERA, 20-21 DE JULHU 2016

Ministériu Finansa (MF) no Ministériu Administrasaun Estatal (MAE) hala’o workshop intregradu iha loron 20-21 Julhu 2016 iha Muníspiu Ermera. Objetivu husi workshop ne’e maka koalia konaba preparasaun desentralizasaun finanseira ba Munisípiu sira iha tinan 2017 mai.

Ministériu Finansas iha inisiativu atu lao tamba ita hatene governo iha polítika foun atu deskonsentra poder. Agora ita tenki halo konferensia hanesan ne’e para ita rona tok administrador sira, planeamentu em jéral hanusa, liu-liu mak planeamentu orsamentu ne’e tamba, se lae ema dehan katak ita gasta deit osan estadu maibe benefí siu ba povu laiha, katak SE. Tomas Cabral, Vice Ministru MAE.

Nia mos hatutan katak, hanesan estadu ida foin sae iha tinan 10 resin ita iha dezafius barak, dezafius sira ne’e mak ita tenki liu husi diálogu ka sorumutu ho benefisiu ne’ebe mak ohin MF iha inisiativa atu realiza. Ida ne’e laos iha deit Ermera, iha futuru ita sei bele halo ho Ministériu sira seluk para bele iha sasukat ba administrasaun 12. Ho oportunidade dialogu ka konferensia ohin ne’e bele hetan obejtivu no solusaun balun hodi bele hadia planu ba futuru.

Iha fatin hanesan SE. Helder Lopes, Vice Ministru Finansa hateten katak, polítika governu sentral husi prespetiva finansa nian iha kontekstu desentralizasaun. Hahu husi tinan 2016 ne’e governo desentraliza ona prosesu pagamentu ba instituisaun estadu sira liu-liu sira ne’ebe ho nia organika autónomu, governu desentraliza ona prosesu hotu-hotu ba ajensia autonomas hodi halo jestaun finanseiru.

Ba tinan 2017, governo iha ona hanoin atu desentraliza orsamentu ba munisipiu sira, tanba ne’e mak Direitur Jeral Finansa Estadu mak toma konta konaba elaborasaun orasamentu jeral do estadu kada tinan, toma nota ona no preparasaun orsamentu sira sei hare oinsa atu estrutura ka tau orsamentu Munisipiu ne’e tuir ninia dalan, lei no prosedimentu hodi nune’e bele sentraliza.

SE. Ministru Finansa reforsa liu tan katak husi prespetiva finanseira, katak iha ona planu foin bele aloka orsamentu hodi ezekuta planu ida ne’e, komponente ne’ebe hakarak aumenta iha ne’e mak poder. Administrador munisipiu no mos administrador postu administrativu iha ona poder maibe poder ne’e mak kuandu la akompanha ho planu no orsamentu, dala ruma poder ne’e laiha poder, tamba ne’e mak governu konsiente teb-tebes no governu hakarak fo poder ba ita bo’ot sira hodi desentraliza orsamentu ba ita bo’ot sira.
Agora dadaun governo sentral adopta hela Program Budgeting ne’ebe alinhamentu entre programa no orsamentu. Exersisiu ida ne’e Ministériu Finansa hamutuk ho Gabinete Primeiru Ministru no linha Ministériu sira seluk halo hela iha nivel nasional.

Iha enseramentu workshop ne’e, SE.Vice MF hato’o agradesementu ba parseirus dezenvolvimentu hanesan UNICEF no partisipantes hotu ba sira nia vontade no sugestaun atu bele habelar tan programa hanesan iha munisípiu sira seluk.

Nia mos hato’o katak bainhira governu desentraliza funsaun Jestaun Finanseira ne’e ba Munisípiu, governu fiar katak durante workshop loron rua ne’e bele hariku no aumenta liu tan kuñesementu iha area jestaun finaseira ho nune’e bele ajuda munisipiu no postu administrativu to iha suku atu implementa programa ne’ebe mak sei fo benefisiu ba ita nia povu.

Partisipantes iha workshop ne’e mak hanesan Administrador Munisípiu, Adminsitrador Posto Administrativu no diretores Munisípius husi Munisípiu Aileu, Ermera no Liquiça.